Allahu i Madhëruar na tërheq vëmendjen për vlerën e kohës duke u betuar në të në shumë ajete të Kur’anit. Ai thotë:
بسم الله الرحمن الرحيم
وَٱلۡعَصۡرِ (1) إِنَّ ٱلۡإِنسَٰنَ لَفِي خُسۡرٍ (2)إِلَّا ٱلَّذِينَ ءَامَنُواْ وَعَمِلُواْ ٱلصَّٰلِحَٰتِ وَتَوَاصَوۡاْ بِٱلۡحَقِّ وَتَوَاصَوۡاْ بِٱلصَّبۡرِ (3)
“Pasha kohën! Me të vërtetë, njeriu është në humbje, përveç atyre që besojnë, bëjnë vepra të mira, këshillojnë njëri-tjetrin për të vërtetën dhe këshillojnë njëri-tjetrin për durim.” (Sure El-Asr, ajetet 1–3)
Kur Allahu betohet për diçka, kjo tregon rëndësinë e saj të jashtëzakonshme. Në këtë sure të shkurtër mësojmë se koha nuk është thjesht kalim ditësh, por është kapitali ynë më i madh. Nëse nuk e mbushim me iman, vepra të mira dhe përkushtim, përfundojmë në humbje.
Në suren “El-Furkan”, ajeti 62 Allahu thotë:
﴿ وَهُوَ الَّذِي جَعَلَ اللَّيْلَ وَالنَّهَارَ خِلْفَةً لِّمَنْ أَرَادَ أَن يَذَّكَّرَ أَوْ أَرَادَ شُكُورًا﴾
“Ai është që krijoi natën dhe ditën që të pasojnë njëra-tjetrën për atë që dëshiron të kujtojë ose të falënderojë.”
Pra, çdo ditë është një mundësi e re për t’u afruar me Allahun.
Profeti Muhamed (Paqja e bekimet e Allahut qofshin mbi të dhe familjen e tij!) ka thënë: “Dy begati janë të nënvlerësuara nga shumë njerëz: shëndeti dhe koha e lirë.”
Sa njerëz e kuptojnë vlerën e kohës vetëm kur e humbin atë? Shumë e kuptojnë rëndësinë e shëndetit kur sëmuren dhe rëndësinë e kohës kur ajo nuk kthehet më.
Në një hadith tjetër, Profeti Muhamed (Paqja e bekimet e Allahut qofshin mbi të dhe familjen e tij!) ka thënë: “Shfrytëzo pesë gjëra para pesë të tjerave: rininë para pleqërisë, shëndetin para sëmundjes, pasurinë para varfërisë, kohën e lirë para angazhimit dhe jetën para vdekjes.” Ky është një program i plotë për jetën. Vini re se e para që përmendet është rinia.
Të dashur vëllezër dhe motra!
Rinia është periudha më e çmuar e jetës. Është koha kur njeriu ka forcë, energji, ëndrra dhe mundësi për të ndërtuar të ardhmen e tij. Kjo periudhë kalon më shpejt se çdo etapë tjetër e jetës. Rinia është amanet nga Allahu. Nuk është pronë e jona që ta përdorim si të duam. Një ditë do të japim llogari për të.
Profeti Muhamed (Paqja e bekimet e Allahut qofshin mbi të dhe familjen e tij!) ka thënë: “Këmbët e njeriut nuk do të lëvizin Ditën e Kiametit derisa të pyetet për katër gjëra… dhe për rininë e tij, se ku e kaloi.”
Pra, sipas kwsaj thwnie tw Profetit tonw tw dashur, ne nuk do të pyetemi vetëm sa vite jetuam, por si i jetuam ato.
Imam Aliu (Paqja qoftë mbi të!) ka thënë: “Koha është jeta jote. Nëse ajo kalon, kalon edhe jeta jote.”
Sa e thellë është kjo fjalë! Nuk është e vërtetë që humbim vetëm disa minuta. Në realitet humbim një pjesë të jetës sonë.
Në një thënie tjetër ai ka thënë: “Koha kalon si reja, prandaj shfrytëzojini kohwn për të bërë mirë.”
Shpesh mendojmë se do të kemi kohë nesër, javën tjetër apo vitin tjetër. Por mundësitë nuk presin gjithmonë.
Imam Xhafer Sadiku (paqja qoftë mbi të) ka thënë: “Mos e shty punën e sotme për nesër, sepse e nesërmja ka punët e veta.”
Shtyrja e vazhdueshme është një nga armiqtë më të mëdhenj të suksesit shpirtëror dhe material.
Në jetën e sotme ka shumë gjëra që na e marrin kohën: telefonat, rrjetet sociale, argëtimet pa kufi dhe bisedat e kota. Nuk ka asgjë të keqe në pushim apo argëtim të lejuar, por kur ato bëhen qëllim në vetvete, ato na vjedhin kapitalin më të madh.
Le ta pyesim veten: Sa kohë kalojmë me Kur’anin? Sa kohë kalojmë në namaz me përkushtim? Sa kohë shpenzojmë për të mësuar diçka të dobishme? Dhe sa orë humbasim pa asnjë dobi?
Imam Aliu (paqja qoftë mbi të) ka thënë: “Vlera e çdo njeriu është aq sa është vlera e asaj që ai e bën mirë.”
Njeriu nuk matet me moshën, por me atë që arrin të ndërtojë gjatë kohës që Allahu ia ka dhënë.
Rinia nuk është vetëm periudha e forcës fizike. Është koha më e mirë për të krijuar zakone të mira: namazin në kohë, leximin e Kur’anit, respektin ndaj prindërve, kërkimin e dijes, shërbimin ndaj njerëzve dhe largimin nga mëkatet.
Në ajetin 69 të sures “El-Ankebut”, Allahu i Madhëruar thotë:
﴿ وَالَّذِينَ جَاهَدُوا فِينَا لَنَهْدِيَنَّهُمْ سُبُلَنَا ۚ وَإِنَّ اللَّهَ لَمَعَ الْمُحْسِنِينَ﴾
“Dhe ata që luftojnë për Ne, Ne pa dyshim do t’i udhëzojmë në rrugët Tona.”
Çdo përpjekje e sinqertë për të përmirësuar veten shpërblehet me ndihmën e Allahut.
Të dashur të rinj e të reja,
Mos prisni të bëheni më të devotshëm kur të plakeni. Zemra edukohet sot. Besimi forcohet sot. Dituria fitohet sot. Veprat e mira fillojnë sot. Një ditë do ta kujtoni rininë tuaj. Pyetja është: A do ta kujtoni me pendim apo me falënderim?
Në vijim do të përmend disa këshilla prraktike për rininë:
E para: Filloje ditën me Allahun
Një ditë që nis me namazin, leximin e disa ajeteve nga Kur’ani dhe një lutje të shkurtër fiton drejtim dhe bereqet.
Allahu thotë: “Vërtet, me përmendjen e Allahut qetësohen zemrat.” (Sure “Err-Rra’d”, ajeti 28)
E dyta: Vendosi vetes synime të qarta
Mos e lër ditën të kalojë pa ditur çfarë dëshiron të arrish. Edhe një hap i vogël çdo ditë ndërton një jetë të madhe.
Imam Aliu (Paqja qoftë mbi të!) ka thënë: “Ai njeri që i barazohen dy ditët e tij është i humbur.” Domethënë, çdo ditë duhet të jemi më të mirë se dje.
E treta: Mëso vazhdimisht
Rinia është koha më e mirë për të fituar dije, si fetare ashtu edhe shkencore. Profeti Muhamed (Paqja e bekimet e Allahut qofshin mbi të dhe mbi familjen e tij!) ka thënë: “Kërkimi i dijes është detyrë për çdo mysliman.” Njw fjalw e urtw thotw: “Dija e fituar në vegjëli është si gdhendja në gur.”
Dija është investim që të shoqëron gjatë gjithë jetës. Imam Aliu I ka thënë Kumejl ibn Zijadit: “O Kumejl! Ti e ruan pasurinë ndërsa dija të ruan ty”.
E katërta: Kufizo kohën në telefon dhe rrjete sociale
Teknologjia është mjet, jo qëllim. Përdore për të mësuar, për të komunikuar dhe për të bërë mirë, jo që të të marrë orë të tëra pa dobi. Pyete veten: “A po e kontrolloj unë telefonin, apo telefoni po kontrollon jetën time?”
E pesta: Zgjidh shoqëri që të afron me Allahun
Shoqëria ndikon fuqishëm në karakter. Profeti Muhamed (Paqja e bekimet e Allahut qofshin mbi të dhe mbi familjen e tij!) ka thënë: “Njeriu është në fenë e shokut të tij; prandaj secili të shohë kë merr për shok.”
E gjashta: Mos e shty pendimin dhe veprat e mira
Shumë njerëz mendojnë: “Do të ndryshoj më vonë.” Në ajetin 133 të sures “Ali Imran” Kur’ani na kujton e na thotë: “Garoni drejt faljes së Zotit tuaj…” Besimtari nuk pret momentin e përsosur për të bërë mirë.
E shtata: Kujdesu për trupin dhe shëndetin
Një trup I shëndetshëm ndihmon në adhurim, punë dhe shërbim. Profeti Muhamed (Paqja e bekimet e Allahut qofshin mbi të dhe mbi familjen e tij) na kujton se shëndeti është një nga begatitë që shumë njerëz nuk I vlerësojnë.
E teta: Bëj çdo ditë një vepër të mire
Nuk duhet të jetë domosdoshmërisht diçka e madhe. Ndihmo prindërit. Vizito një të afërm. Jep sadeka. Bëj dua për dikë. Fale dikë. Buzëqesh gjithmonë.
Profeti Muhamed (Paqja e bekimet e Allahut qofshin mbi të dhe mbi familjen e tij) ka thënë: “Veprat më të dashura tek Allahu janë ato që bëhen vazhdimisht, edhe nëse janë të pakta.”
E nënta: Planifiko kohën
Ndaje ditën në kohë për adhurim, për mësim ose punë, për familjen, për pushim, për aktivitet fizik. Një ditë e planifikuar është shumë më e frytshme se një ditë që rrjedh pa drejtim.
E dhjeta: Kujto se rinia nuk zgjat përgjithmonë
Imam Aliu (Paqja qoftë mbi të!) ka thënë: “Koha kalon si retë, prandaj shfrytëzojeni kohwn pwr tw mira.” Çdo ditë që kalon nuk kthehet më. Çdo mëngjes është një dhuratë dhe një amanet nga Allahu.
Të dashur të rinj!
Mos u përpiqni vetëm të kaloni kohën, por përpiquni ta mbushni atë me vlerë. Mos kërkoni vetëm një jetë të gjatë, por një jetë të bekuar. Çdo minutë që ju afron me Allahun është fitore, ndërsa çdo minutë që humbet pa dobi nuk kthehet më. Rinia është amaneti më i çmuar që Allahu ju ka dhënë. Ruajeni, zhvillojeni dhe përdoreni në atë mënyrë që një ditë, kur ta takoni Zotin tuaj, të mos pendoheni për kohën që ju është besuar. Bwjeni kohën tuaj të mbushur me atë që i sjell dobi fesë, familjes, shoqërisë dhe vetes sonë.
Lus Allahun e Madhëruar që të na japë bereqet në kohën tonë, të na bëjë prej atyre që e shfrytëzojnë rininë në bindje ndaj Tij dhe të na ruajë nga humbja e jetës në gjëra të kota!
O Allah, na bëj prej atyre që, kur u jepet kohë, e përdorin për vepra të mira; kur u jepet rini, e përdorin në bindje ndaj Teje; dhe kur të vijë fundi ynë, të të takojmë tduke qenë i kënaqur me ne dhe ne të kënaqur me Ty!

