Në ajetin 101 të sures “Junus” Allahu i Madhëruar thotë:
﴿قُلِ انظُرُواْ مَاذَا فِي السَّمَاواتِ وَ الاَْرْضِ﴾
“Thuaj: Shikoni ç’ka në qiej dhe në Tokë!”
Në këtë ajet Allahu i fton njerëzit të vështrojnë dhe të meditojnë mbi gjithçka që gjendet në qiej dhe në Tokë, sepse në krijimin e tyre gjenden shenja të qarta që dëshmojnë madhështinë, fuqinë dhe urtësinë e Tij. Besimi i vërtetë nuk ndërtohet mbi verbërinë, por mbi vëzhgimin, reflektimin dhe njohjen e shenjave hyjnore në univers.
Njohja e Allahut përmes krijimit të Tij është një nga rrugët më të rëndësishme që na mëson Kur’ani. Allahu i Madhëruar na fton vazhdimisht të meditojmë mbi universin, tokën, qiellin, njeriun dhe çdo gjë që na rrethon, sepse ato janë shenja që tregojnë për praninë, urtësinë, fuqinë dhe mëshirën e Tij.
Për ta njohur Allahun përmens krijimit Tij Kur’ani na njeh me disa rrugë kryesore. Në këtë emission do të përmend pesë prej tyre, që janë:
E para: Duke medituar mbi krijimin e qiejve dhe tokës
Në ajetin 190 të sures “Ali Imran”Allahu i Madhëruar thotë:
﴿إِنَّ فِي خَلۡقِ ٱلسَّمَٰوَٰتِ وَٱلۡأَرۡضِ وَٱخۡتِلَٰفِ ٱلَّيۡلِ وَٱلنَّهَارِ لَأٓيَٰتٖ لِّأُوْلِي ٱلۡأَلۡبَٰبِ﴾
“Me të vërtetë, në krijimin e qiejve dhe të tokës, në ndërrimin e natës dhe të ditës, ka shenja për njerëzit e mençur.”
Ky ajet na mëson se universi nuk është krijuar rastësisht. Rregulli i përsosur i kozmosit, lëvizja e planetëve, ardhja e ditës pas natës dhe e natës pas ditës, të gjitha dëshmojnë për një Krijues të Urtë dhe të Plotfuqishëm.
E dyta: Duke medituar mbi vetveten tonë
Në ajetin 21 të sures “Edh Dharijat” Allahu i Madhëruar thotë:
﴿ وَفِي أَنفُسِكُمْ ۚ أَفَلَا تُبْصِرُونَ﴾
“Edhe në vetveten tuaj; a nuk po shihni?”
Trupi i njeriut, zemra që rreh pa pushim, sistemi nervor, mendja dhe shpirti janë argumente të qarta të fuqisë së Allahut. Sa më shumë që njeriu njeh veten, aq më shumë e njeh Krijuesin e vet.
E treta: Duke parë shenjat e Allahut në natyrë
Në ajetin 164 të sures “El Bekare” Allahu i Madhëruar thotë:
﴿إِنَّ فِي خَلۡقِ ٱلسَّمَٰوَٰتِ وَٱلۡأَرۡضِ وَٱخۡتِلَٰفِ ٱلَّيۡلِ وَٱلنَّهَارِ وَٱلۡفُلۡكِ ٱلَّتِي تَجۡرِي فِي ٱلۡبَحۡرِ بِمَا يَنفَعُ ٱلنَّاسَ وَمَآ أَنزَلَ ٱللَّهُ مِنَ ٱلسَّمَآءِ مِن مَّآءٖ فَأَحۡيَا بِهِ ٱلۡأَرۡضَ بَعۡدَ مَوۡتِهَا وَبَثَّ فِيهَا مِن كُلِّ دَآبَّةٖ وَتَصۡرِيفِ ٱلرِّيَٰحِ وَٱلسَّحَابِ ٱلۡمُسَخَّرِ بَيۡنَ ٱلسَّمَآءِ وَٱلۡأَرۡضِ لَأٓيَٰتٖ لِّقَوۡمٖ يَعۡقِلُونَ﴾
“Me të vërtetë, në krijimin e qiejve dhe të Tokës, në këmbimin e natës me ditën, në anijet që lundrojnë nëpër det për t’u sjellë dobi njerëzve, në ujin që Allahu zbret prej qiellit, duke ngjallur përmes tij tokën e vdekur dhe duke shpërndarë gjithfarë gjallesash, në lëvizjen e erërave dhe në retë që qëndrojnë midis qiellit e Tokës, pra, në të gjitha këto, sigurisht që ka shenja për njerëzit me intelekt.”
Në këtë ajet Allahu i fton njerëzit të meditojnë mbi mrekullitë e krijimit: qiejt, Tokën, natën e ditën, shiun, erërat, detet dhe gjallesat, sepse në to gjenden prova të qarta të fuqisë, urtësisë dhe mëshirës së Tij. Këto shenja i kuptojnë dhe përfitojnë prej tyre ata që përdorin mendjen dhe reflektojnë me sinqeritet. Universi është një libër i hapur i shenjave hyjnore; kush mediton mbi të me mendje dhe zemër të hapur, arrin të njohë Krijuesin dhe urtësinë e Tij.
E katërta: Duke kuptuar urtësinë dhe qëllimin në krijim
Në aketin 27 të sures “Sad” Allahu i Madhëruar thotë:
﴿ وَمَا خَلَقْنَا السَّمَاءَ وَالْأَرْضَ وَمَا بَيْنَهُمَا بَاطِلًا… ﴾
“Ne nuk i krijuam qiellin, tokën dhe çfarë ka ndërmjet tyre kot.”
Kur shohim harmoninë dhe qëllimin në krijim, kuptojmë se Krijuesi është i Urtë dhe se edhe jeta e njeriut ka një qëllim të lartë.
E pesta: Duke reflektuar mbi emrat dhe cilësitë e Allahut në krijim
Krijimi na njeh me cilësitë e Allahut:
Madhështia e universit na tregon se Allahu është i Madh dhe i Plotfuqishëm.
Rregulli i krijimit na tregon se Allahu është i Urtë.
Mirësitë e panumërta na tregojnë se Allahu është Furnizuesi dhe Dhuruesi.
Bukuria e natyrës na tregon se Allahu është i Bukuri dhe Krijuesi më i mirë.
Në ajetin 53 të sures “Fusilet” Allahu i Madhëruar thotë:
﴿ سَنُرِيهِمْ آيَاتِنَا فِي الْآفَاقِ وَفِي أَنفُسِهِمْ حَتَّىٰ يَتَبَيَّنَ لَهُمْ أَنَّهُ الْحَقُّ ۗ أَوَلَمْ يَكْفِ بِرَبِّكَ أَنَّهُ عَلَىٰ كُلِّ شَيْءٍ شَهِيدٌ﴾
Ne do t’u tregojmë atyre shenjat Tona në hapësirat tokësore e qiellore, si dhe në vetvete, derisa t’u bëhet plotësisht e qartë se ai (Kur’ani) është e vërteta. Vallë, a nuk të mjafton ty që, Zoti yt është Dëshmues i çdo gjëje?!
Ky ajet nuk flet vetëm për argumente shkencore apo kozmologjike, por edhe për udhëtimin e brendshëm të njeriut drejt njohjes së Allahut. Kush njeh veten e tij, gjen gjurmët e Allahut në shpirtin e vet. Prandaj udhëtimi drejt njohjes së vetes bëhet rrugë drejt njohjes së Allahut.
Kur’ani na mëson se e gjithë bota është një pasqyrë e shenjave të Allahut. Çdo yll në qiell, çdo pikë shiu, çdo lule dhe çdo frymëmarrje e njeriut na fton të njohim Krijuesin tonë. Prandaj, sa më shumë të meditojmë mbi krijimin me zemër të hapur dhe mendje të vetëdijshme, aq më shumë forcohet njohja, besimi dhe dashuria jonë për Allahun e Madhëruar.
Sa bukur na flet ajeti 13 në suren “El Xhathije”:
وَسَخَّرَ لَكُم مَّا فِي ٱلسَّمَٰوَٰتِ وَمَا فِي ٱلۡأَرۡضِ جَمِيعٗا مِّنۡهُۚ إِنَّ فِي ذَٰلِكَ لَأٓيَٰتٖ لِّقَوۡمٖ يَتَفَكَّرُونَ
“Ai ua ka nënshtruar juve atë që është në qiej dhe atë që është në tokë, të gjitha janë prej Tij. Me të vërtetë, në këtë ka shenja për njerëzit që mendojnë.”
Të dashur vëllezër dhe motra!
Këto ishin pesë prej rrugëve të njohjes së Allahut përmes krijimit. Kur’ani i Shenjtë është përplot me ajete që ftojnë në meditim e reflektim në krijimin e Allahut me qëllim që ta njohim atë ashtu siç e meriton njohjen. Njohja e Allahut përmes krijimit nuk kërkon sy të jashtëzakonshëm, por një zemër të zgjuar dhe një mendje që mediton. Çdo gjë që na rrethon, qiejt, toka, yjet, malet, detet, jeta dhe vetë ekzistenca jonë, është një shenjë që na fton drejt Krijuesit. Sa më shumë të reflektojmë mbi veprat e Allahut, aq më shumë rritet njohja, dashuria dhe bindja jonë ndaj Tij. Le ta bëjmë meditimin mbi krijimin një adhurim të përditshëm, që përmes shenjave të Tij të afrohemi më shumë te Ai dhe ta forcojmë besimin tonë.
Allahu na bëftë prej atyre që shohin shenjat e Tij, i kuptojnë ato dhe i përgjigjen thirrjes së Tij me besim e përulësi!
